झलनाथ खनालले भने– राष्ट्रपति बनाइदेउ भनेर नमस्कार गर्दै हिँड्दिन

२० पुस, झापा । पूर्व प्रधानमन्त्री एवं नेकपा एमालेका नेता झलनाथ खनालले आफूले राष्ट्रपति पद अस्वीकार नगर्ने तर, राष्ट्रपति बनाइदेऊ भनेर नमस्कार गर्दै नहिँड्ने बताएका छन् ।भावी राष्ट्रपतिको दाबेदारको रुपमा खनालको चर्चा भइरहँदा उनको यो अभिव्यक्ति आएको हो । बिहीबार झापाको बिर्तामोडमा आयोजित पत्रकार सम्मेलनमा बोल्दै नेता खनालले भने, ‘राष्ट्रपतिको भूमिका पनि महत्वपूर्ण भूमिका हो । त्यसलाई म अस्वीकार चाहिँ गर्दिन । तर, राष्ट्रपति बनाइदेउ भनेर नमस्कार गरेर हिँड्ने वाला पनि छुइन ।’

उनले आफू सक्रिय मान्छे भएको भन्दै निरन्तर सक्रिय रही रहने समेत बताए । ‘म सक्रिय मान्छे हुँ । निरन्तर सक्रिय भइरहन्छु’, उनले भने, ‘राष्ट्रपति भए पनि म चुप लागेर बस्नेवाला छैन । चुप लाग्नका लागि म राजनीतिमा आएको होइन ।’अर्को प्रसङ्गमा उनले वाम एकताका लागि निरन्तर छलफल भइरहेको बताए । ‘पार्टी अध्यक्ष कसलाई बनाउने र प्रधानमन्त्री कसलाई बनाउने भन्नेमा हामी नेतृत्व पंक्तिबाट छलफल गरेर निष्कर्षमा पुग्छौं’, खनालले भने । २०७४ पुष २० गते  प्रकाशित

साभारः अनलाइन खबरबाट