५० हजार घुससहित इन्जिनियर पक्राउ
पोखरा : नहर (कुलो) निर्माण सम्पन्नको प्रमाणपत्र दिएबापत ५० हजार रुपैयाँ घुस लिएको आरोपमा अख्तियार दुरुपयोग अनुसन्धान आयोगको पोखरा कार्यालयले सिँचाइ डिभिजन कार्यालय कास्कीका इन्जिनियर गोविन्द भुर्तेललाई पक्राउ गरेको छ। बुधबार सिँचाइकै कार्यालय पोखरा १३ भद्रकालीबाट परिसरभित्रकै निवास जाँदै गर्दा इन्जिनियर भुर्तेललाई घुसको रकमसहित समातेर आफ्नै हिरासतमा राखेको अख्तियार पोखरा प्रमुख यदु पन्थीले जानकारी दिए।
उनका अनुसार रुपा गाउँपालिकामा बनेको १ हजार ७ सय मिटर लामो टाकान्जा टार नहर कुलोको सम्पन्न प्रमाणपत्रका लागि भुर्तेलले घुस लिएका हुन्। पोखरा बिरौटास्थित सिएम पर्फेक्ट जेभी कन्स्ट्रक्सनले १ करोड ५० लाख रुपैयाँमा उक्त नहर कुलो निर्माण गरेको थियो। महिनौंसम्म पनि निर्माण सम्पन्नको प्रमाणपत्र नदिएर झुलाउँदै इन्जिनियर भुर्तेलले घुस मागेको सिकायत अख्तियारलाई गरेका थिए। त्यसैका आधारमा अख्तियारले भुर्तेललाई पैसासहित पक्रेको हो। अनुसन्धान जारी राखेको र थप कारबाहीका लागि प्रहरी हिरासत वा आयोगकै केन्द्रमा पठाउन सकिने पन्थीले जानकारी दिए।
केशवशरण लामिछाने ,साभारः अन्नपूर्ण पोष्टबाट
Comments
Post a Comment