एक्लो तेस्रोलिंगी मतदाता

प्युठान : प्युठानमा यसपटक निर्वाचनमा एक जना तेस्रोलिंगी मतदाता छन्। हेर्दा महिलाजस्तै, पहिरन पनि महिलाकै तर बोली सुन्दा पुरुष। उनी हुन्, प्युठान नगरपालिका-३ स्थित विजयनगर रातामाटाकी हीराकुमारी कुमाल। उनको निर्वाचन क्षेत्र १ नम्बरमा पर्छ। उनले मुक्ति मावि रातमाटा मतदान केन्द्रबाट भोट दिन्छिन्। ४९ वर्षीया कुमालले तेस्रो पटक भोट गर्न लागेकी हुन्। उनले यसअघि दोस्रो संविधानसभा र स्थानीय तह निर्वाचनमा भोट गरेकी थिइन्। भोट दिएर नेतालाई जिताए पनि आश्वासन पूरा नगरेको उनको गुनासो छ। ‘घरमा एक्लै बस्छु', उनी भन्छिन्, ‘कसैको सहारा छैन। जीवनभर एक्लै बस्नुपर्ने होला। न जागिरका लागि योग्य छु न त भरपर्दो आम्दानी छ। कसरी जीवन चलाउने ? '

उनले स्थानीय तह निर्वाचनमा भोट माग्न आएका उम्मेदवारहरुसँग जागिरको माग गरेकी रहिछन्। ‘जितेपछि कार्यालय परिसरमा फूल लगाउने जागिर दिन्छु भन्नुहुन्थ्यो', उनी भन्छिन्, ‘तर, कसैले हेर्नुभएन।' कुनै संघसंस्था, कार्यालयमा काम गरेर कमाइ गर्ने उनको धोको छ। घरका आठ भाइ-बहिनीमध्ये उनी माइली छोरी हुन्। पाँच छोरा र तीन छोरीमध्ये उनी मात्र फरक खालको जन्मिएकी हुन्। ‘गाउँमा कसै-कसैले हेला गरेर बोलाउने गर्छन्', उनी दुःखेसो सुनाउँछिन्, ‘मेरो जन्मै यस्तै भयो। यसमा मेरो के दोष थियो र ? बाहिर निस्किँदा हेपाहा नजरले हेर्छन्।' उमेर छँदासम्म काम गरेर ज्यान पाल्ने उनको सोच रहेछ। भन्छिन्, ‘बूढेसकाल लागेपछि कसरी बाँच्ने होला भन्ने चिन्ता लागिरहन्छ।' उनी अनपढ छिन्। अरूले गरेको फोन मात्र उनले उठाउन जानेकी छन्। तर, आफैं नम्बर डायल गरेर फोन गर्न जान्दिनन्। ‘प्रौढ शिक्षा पढ्न गएँ', उनी भन्छिन्, ‘जति पढे पनि आएन।' यही मंसिर २१ गते हुने दोस्रो चरणको प्रतिनिधिसभा तथा प्रदेशसभा निर्वाचनका लागि प्युठानमा एक लाख ३८ हजार ६ सय ४१ जना मतदाता छन््। यसमध्ये ७२ हजार ६ सय एक महिला र ६६ हजार ३९ पुरुष मतदाता रहेको निर्वाचन कार्यालयले जनाएको छ। एक जना तेस्रोलिंगी मतदाता रहेको जिल्ला निर्वाचन अधिकारी कृष्णबहादुर कुँवरले बताए।

केशर रोका,साभारः अन्नपूर्ण पोष्टबाट